ភ្នំពេញៈ ផ្ទះស្នាក់តាមសហគមន៍គឺជាទីតាំងទេសចរណ៍ដែលអ្នកគួរតែសាកល្បងព្រោះវានឹងធ្វើឱ្យអ្នកទទួលបានបទពិសោធន៍ថ្មី នៃការដើរលេងបែបឯកជនប្លែកអារម្មណ៍ ជាពិសេសការស្នាក់នៅ មានតម្លៃធូរថ្លៃ និងចំណេញច្រើនតួយ៉ាងការស្នាក់នៅភូមិបណ្តែតទឹក ឧទ្យានជាតិ តំបន់ការពារ ភូមិតាមតំបន់ឬសហគមន៍ជនជាតិដើមភាគតិចដាច់ស្រយាលជាដើម។
ក្នុងអត្ថបទនេះសារព័ត៌មានឌីជីថល SR លើកយកពីអត្ថប្រយោជន៍ទាំង៨ ដែលអ្នកគួរស្នាក់នៅផ្ទះ សហគមន៍៖
១.ជួបជាមួយប្រជាជនក្នុងតំបន់
នៅពេលអ្នកស្នាក់នៅផ្ទះសហគមន៍អ្នកនឹងបានប្រាស្រ័យទាក់ទងនឹងប្រជាជនផ្ទាល់ឬអ្នកអាចរស់នៅជាមួយពួកគេបានផងដែរជាពិសេសបានដឹងពីរបៀបរស់នៅរបស់ពលរដ្ឋក្នុងតំបន់ដែលមិនដូចការគេងតាមផ្ទះសំណាក់ សណ្ឋាគារ នៅតាមកន្លែងដើរលេងនានាឡើយ។
២. តម្លៃស្នាក់នៅធូរថ្លៃ
ការស្នាក់នៅផ្ទះស្នាក់សហគមន៍មានតម្លៃធូរថ្លៃចាប់ពី ៣ ទៅ ៧ ដុល្លារក្នុងមួយយប់ សម្រាប់មនុស្សម្នាក់ដោយអាស្រ័យលើកន្លែងស្នាក់នៅ និងភាពដាច់ស្រយាលនៃទីតាំងហើយចំណុចនេះធ្វើឱ្យអ្នកចំណេញ ដោយមិនចាំបាច់ចំណាយច្រើនក្នុងការស្នាក់នៅនិងបានចូលរួមដល់សហគមន៍ផងដែរ។
៣.ដឹងពីស្ថានភាពជាក់ស្តែង និងជីវិតពិតប្រាកដ
ចង់ភ្លក្សរសជាតិដើរលេងប្លែកអារម្មណ៍អ្នកគួរទៅឱ្យហួសពីកន្លែងដើរលេងល្បីៗនៅតាមតំបន់ទីក្រុង ទីប្រជុំជនឬទីក្រុងឆ្នេរសមុទ្រ ដោយអ្នកគួរទៅលេង និងស្នាក់នៅផ្ទះសហគមន៍វិញព្រោះនៅទីនោះ
អ្នកនឹងបានឃើញស្ថានភាពជាក់ស្តែងនិងបានមើលពីជីវិតប្រជាជន ហើយសហគមន៍ទាំងនោះ នឹងនាំអ្នកទៅលេងនៅតំបន់នានាដូចជាតំបន់ប្រវត្តិសាស្ត្រដែលមិនសូវមានគេស្គាល់ ឬតំបន់ទេសចរថ្មី ប្លែកក៏ដូចជាបានទៅជួបសហគមន៍ជនជាតិដើមភាគតិចនៅតំបន់ដាច់ស្រយាលផងដែរ។
៤.ញ៉ាំអាហារតាមផ្ទះសហគមន៍
ខុសពីការញ៉ាំអាហារតាមភោជនីដ្ឋានអាហារដ្ឋាន ឬតូបអាហារនៃរមណីយដ្ឋាននានា ការញ៉ាំអាហារនៅផ្ទះសហគមន៍អ្នកនឹងបានភ្លក្សស្នាដៃរបស់ប្រជាសហគមន៍ផ្ទាល់ ដោយញ៉ាំអាហារនៅទីតាំងដែលសហគមន៍រៀបចំឱ្យជាលក្ខណៈជុំគ្នាដែលនេះអ្នកហាក់ដូចជាញ៉ាំអាហារជាមួយក្រុមគ្រួសារនៅផ្ទះដូច្នោះដែរ។
៥. ផ្តល់ឱ្យអ្នកនូវបទពិសោធន៍ថ្មីពីអ្នកស្រុក
ផ្ទះស្នាក់សហគមន៍ភាគច្រើនមិនត្រឹមតែផ្តល់កន្លែងស្នាក់នៅប៉ុណ្ណោះទេប៉ុន្តែក៏មានបទពិសោធន៍ក្នុងស្រុកផ្សេងទៀតផងដែរ ដូចជាការរៀនធ្វើម្ហូប ដំណើរកម្សាន្តតាមភូមិការធ្វើសិប្បកម្ម ការជិះកង់ ការជិះរទេះគោ ឬគោយន្តនិងសកម្មភាពជាច្រើនទៀត។ សកម្មភាពទាំងនេះហាក់ដូចជាអ្នកជាប្រជាជនរស់នៅទីនោះផ្ទាល់ ដែលកំពុងធ្វើកិច្ចការប្រចាំថ្ងៃហើយនោះអ្នកកាន់តែដឹងពីសហគមន៍មូលដ្ឋានច្បាស់។
៦. រៀនវប្បធម៌និងទំនៀមទម្លាប់ក្នុងស្រុក
ស្នាក់នៅផ្ទះតាមសហគមន៍អ្នកនឹងបានយល់ដឹងពីរប្បធម៌ ទំនៀមទម្លាប់របស់អ្នកស្រុកក្នុងតំបន់ផ្ទាល់ថាតើតំបន់នេះមានទំនៀមបែបណា? គេនិយមធ្វើកម្មវិធីអ្វីខ្លះ?និងមានតំណមអ្វីខ្លះ ដែលវាហាក់ខុសប្លែកពីអ្វីដែលអ្នកបានដឹងពីគេតៗគ្នាឬបានអានចេញពីមេរៀន ឬសៀវភៅ។
៧.ស័ក្កសមចំពោះអ្នកចូលចិត្តដើរលេងម្នាក់ឯង
ការធ្វើដំណើរតែម្នាក់ឯងគឺជាបទពិសោធន៍មួយល្អក្នុងជីវិតដែលបង្ហាញពីភាពក្លាហាន។ អ្នកចូលចិត្ត ដើរលេងម្នាក់ឯងកាន់តែស័ក្កសមចំពោះការស្នាក់នៅតាមផ្ទះសហគមន៍ព្រោះអ្នកនឹងមានទំនុកចិត្តខ្ពស់ ដោយសារតែប្រជាសហគមន៍គឺជាមិត្តដ៏ជិតស្និទ្ធ ដែលកំដរអ្នកទៅកាន់តែកម្សាន្តនានាញ៉ាំអាហារជាមួយគ្នា ហើយអ្នកបានស្នាក់នៅផ្ទះតែមួយជាមួយប្រជាសហគមន៍។
៨ . អនុស្សាវរីយ៍ល្អៗដែលអ្នកមិនអាចបំភ្លេចបាន។
ការស្នាក់នៅផ្ទះសហគមន៍នឹងបន្សល់ទុកនូវអនុស្សាវរីយ៍ល្អក្នុងការចងចាំ ដោយសារតែភាពរួសរាយរាក់ទាក់, ស្នាដៃធ្វើម្ហូបដ៏ឆ្ញាញ់ជាប់មាត់, ការរស់នៅពិតៗក្នុងភូមិនិងការកម្សាន្តលក្ខណៈឯកជន សេរីភាព និងមេរៀនជីវីតជាច្រើនដែលផ្តល់ឱ្យអ្នកតាមរយៈផ្ទះសហគមន៍៕
