ក្រុមអ្នកស្រាវជ្រាវដែលដឹកនាំដោយសាស្រ្តាចារ្យ ហុង ជីនគី (Hong Jin-kee)នៅសាកលវិទ្យាល័យ Yonsei ក្នុងទីក្រុងសេអ៊ូល កំពុងបង្កើតប្រភពប្រូតេអ៊ីនដ៏អស្ចារ្យមួយគឺ «បាយសាច់»។
ការច្នៃបង្កើតថ្មីនេះពាក់ព័ន្ធនឹងការចាក់បញ្ចូលកោសិកាសាច់គោទៅក្នុងគ្រាប់ធញ្ញជាតិនីមួយៗ ដែលនាំឱ្យអង្ករដែលដាំជាបាយមានពណ៌ផ្កាឈូក ជាមួយនឹងក្លិនឈុនប៊័រតិចៗ។
លោកសាស្ត្រាចារ្យ ហុង ពន្យល់ ដោយលើកឡើងពីអត្ថប្រយោជន៍កាត់បន្ថយការសម្លាប់សត្វចិញ្ចឹមនិងកត្តាជួយបរិស្ថាន យ៉ាងដូច្នេះថា៖ «យើងអាចទទួលបានប្រូតេអ៊ីនសត្វដោយមិនចាំបាច់សម្លាប់សត្វ»។
អង្ករ ដែលជាប្រភពអាហារមូលដ្ឋាន និងជាប្រូតេអ៊ីនដ៏សំខាន់រួចទៅហើយសម្រាប់ប្រជាជននៅអាស៊ីមានសណ្ឋានសាច់អង្ករមិនហាប់ពេក ដែលអាចឱ្យកោសិកាសាច់លូតលាស់បាន។
ទោះបីជាដំណើរការស្រាវជ្រាវផលិតនេះកំពុងប្រើពេលយូរ ក្រុមរបស់លោកសាស្ត្រាចារ្យហុងមើលឃើញពីសក្ដានុពលដ៏ធំនាថ្ងៃអនាគត។
«អង្ករសាច់» របស់ពួកគេអាចផ្តល់នូវប្រូតេអ៊ីន ៨% និងជាតិខ្លាញ់ច្រើនជាងអង្ករធម្មតា ៧%ដែលធ្វើឱ្យវាក្លាយជាប្រភពអាហារូបត្ថម្ភដ៏មានតម្លៃសម្រាប់អ្នកដែលប្រឈមនឹងអសន្តិសុខអាហារ។
លើសពីនេះ ក្រុមអ្នកស្រាវជ្រាវផលិតបានប៉ាន់ប្រមាណថា វិធីសាស្ត្រនេះមានកម្រិតបំភាយជាតិកាបូនទាបខ្លាំងបើប្រៀបធៀបទៅនឹងការផលិតសាច់គោបែបប្រពៃណី។
បញ្ហាប្រឈមនៅតែមាន រួមទាំងការបង្កើនផលិតកម្មនិងការទទួលបានការយល់ព្រមពីបទប្បញ្ញត្តិក្នុងការប្រើប្រាស់អង្ករបណ្ដុះកោសិកាសាច់បែបនេះ។
ទោះជាយ៉ាងណាក៏ដោយ ការវិនិយោគរបស់ប្រទេសកូរ៉េខាងត្បូងនៅក្នុង «បច្ចេកវិទ្យាអាហារ»និងការចាប់អារម្មណ៍ជាសាកល ទៅលើសាច់សត្វដែលកកើតដោយការបណ្ដុះតាមបច្ចេកទេសមន្ទីរពិសោធន៍បានក្លាយជាសញ្ញាជោគជ័យសម្រាប់របត់ពិភពលោកឆ្ពោះទៅរកប្រភពប្រូតេអ៊ីនដោយមិនចាំបាច់ចិញ្ចឹមនិងសម្លាប់សត្វ។
អ្នកជំនាញដូចជា Neil Stephens មកពីសាកលវិទ្យាល័យ Birmingham បានទទួលស្គាល់សក្ដានុពលរបស់សាច់បណ្ដុះក្នុងមន្ទីរពិសោធន៍ ជាដំណោះស្រាយបញ្ហាអាកាសធាតុប៉ុន្តែលោកសង្កត់ធ្ងន់លើតម្រូវការផលិតលក់ក្នុងតម្លៃសមរម្យ និងផ្ដល់ប្រសិទ្ធភាពថាមពល។
គោលគំនិតនៃការបង្កើត «អង្ករសាច់» របស់លោកសាស្ត្រាចារ្យ ហុងដែលរួមបញ្ចូលកោសិកាសត្វជាមួយនឹងរុក្ខជាតិ អាចផ្តល់អត្ថប្រយោជន៍ច្រើនក៏ដូចជាឆ្លើយតបនឹងបញ្ហាខាងលើនេះផងដែរ។
អនាគតនៃការផលិតអាហារហាក់ដូចជាមានទំនោរទៅរកជីវបច្ចេកវិទ្យា។ សាស្ត្រាចារ្យហុង ស្រមៃមើលពិភពលោកដែលអាចផលិតអាហាររូបត្ថម្ភផ្ទាល់ខ្លួន តាមរយៈផ្ទះបាយដែលប្រើ AI ដែលណែនាំមនុស្សយន្តឱ្យរៀបចំអាហារតាមតម្រូវការសុខភាពរបស់មនុស្សឆ្លើយតបនឹងរោគវិច្ឆិឆ័យពិនិត្យឈាម។
សួរថាតើមនុស្សទូទៅអាចទទួលយកការបរិភោគ «អង្ករសាច់» ឬការច្នៃប្រឌិតបែបវិទ្យាសាស្ត្រស្រដៀងគ្នានេះដែរឬទេ?ចម្លើយនៅពុំទាន់ច្បាស់នោះទេ ប៉ុន្តែការស្រាវជ្រាវរកអាហារនៃថ្ងៃអនាគតពេលដែលពិភពលោកប្រឈមនឹងបញ្ហាអាកាសធាតុវាពិតជារុញច្រានព្រំដែននៃអាហារក្នុងផ្ទះបាយសាមញ្ញទៅជាអាហារផលិតដោយជីវបច្ចេកវិទ្យា៕
.jpg)
