ក្រសួងបរិស្ថាននាំវិស័យឯកជនទៅទស្សនកិច្ចស្វែងយល់ពីសក្តានុពលទេសចរណ៍ធម្មជាតិនៅឧទ្យានជាតិព្រះជ័យវរ្ម័ន-នរោត្ដមភ្នំគូលែន
យូសុះ អាប់ឌុលរ៉ាស់ហ៊ីម
សៀមរាប៖ ក្រុមការងារអនុវត្តរបស់គម្រោង«និរន្តរភាពតំបន់ទេសភាពនិងទេសចរណ៍ធម្មជាតិកម្ពុជា» បានរៀបចំទស្សនកិច្ចសម្រាប់វិស័យឯកជនទៅកាន់គោលដៅលម្ហែបៃតងនៃឧទ្យានជាតិព្រះជ័យវរ្ម័ន-នរោត្ដម ភ្នំគូលែន»ជាទីដែលក្រសួងបរិស្ថានបានរៀបចំជាសហគមន៍ ដើម្បីគោលដៅនិរន្តរភាពនិងការអភិរក្សធម្មជាតិក្នុងតំបន់អេកូទេសចរណ៍ប្រវត្តិសាស្ត្រ។
យោងតាមលោក ឃិន ម៉េងឃាងប្រធាននាយកដ្ឋានទេសចរណ៍ធម្មជាតិ នៃអគ្គនាយកដ្ឋានមូលដ្ឋាននៃក្រសួងបរិស្ថាន គម្រោង«និរន្តរភាពតំបន់ទេសភាពនិងទេសចរណ៍ធម្មជាតិកម្ពុជា» ដែលហៅកាត់ថា CSLEP បានធ្វើដំណើរទស្សនកិច្ចពីថ្ងៃទី២៤ ដល់ថ្ងៃទី២៥ ខែតុលា ដោយទទួលបានការគាំទ្រពីធនាគារពិភពលោក។
លោកបានប្រាប់សារព័ត៌មាន SR ឱ្យដឹងថា៖ «យើងបានអញ្ជើញតំណាងក្រសួងស្ថានប័នពាក់ព័ន្ធវិស័យឯកជនជាច្រើន ដែលគាត់ធ្វើធុរកិច្ចទេសចរណ៍ដើម្បីស្វែងយល់តំបន់ទាក់ទាញទេសចរណ៍ធម្មជាតិនៅក្នុងឧទ្យានជាតិព្រះជ័យវរ្ម័ន-នរោត្ដម«ភ្នំគូលែន» ជាពិសេសតំបន់ប្រវត្តិសាស្ត្រតំបន់បុរាណស្ថាន ហើយនឹងតំបន់ព្រៃឈើធម្មជាតិ ទឹកធ្លាក់ សត្វព្រៃជាដើម»។
គម្រោងនេះមានគោលបំណងសិក្សាស្វែងយល់អំពីទីតាំងសក្តានុពល និងឱកាសក្នុងការអភិវឌ្ឍគម្រោងទេសចរណ៍ធម្មជាតិភ្ជាប់បណ្តាញទំនាក់ទំនងជាមួយក្រសួង-ស្ថាប័នពាក់ព័ន្ធ វិស័យឯកជន និងសហគមន៍មូលដ្ឋានតាមរយៈការគាំទ្រគោលនយោបាយអនុវត្តគម្រោងទេសចរណ៍ធម្មជាតិក្នុងតំបន់ការពារធម្មជាតិនិងចែករំលែកចំណេះដឹង និងផ្សព្វផ្សាយគោលដៅលម្ហែបៃតងក្នុងតំបន់ការពារធម្មជាតិ។
ការរៀបចំគោលដៅលម្ហែបៃតងសំដៅលើតំបន់សក្តានុពលទេសចរណ៍ធម្មជាតិ ដែលមាននៅក្នុងតំបន់ការពារធម្មជាតិដែលត្រូវបានសិក្សា ដោយរក្សាបាននូវគោលការណ៍ចំនួន៣ គឺ៖ ភាពស្អាត ភាពបៃតងនិងចីរភាព ដើម្បីធានាបានការគ្រប់គ្រងធនធានធម្មជាតិ ការអភិរក្សជីវៈចម្រុះនិងការលើកកម្ពស់ជីវភាពសហគមន៍ប្រកបដោយនិរន្តភាព ការរក្សានិងបង្កើនគម្របព្រៃឈើជាអតិបរិមា និងឈានទៅសម្រេចបាននូវសហគមន៍អព្យាក្រឹតកាបូននៅឆ្នាំ២០៥០។នេះបើយោងតាមលោក ឃិន ម៉េងឃាង។
នៅក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន»មានទឹកជ្រោះ ប្រាសាទបុរាណ បុរាណស្ថាន និងពើងធម្មជាតិដែលមានភាពទាក់ទាញទេសចរមកកម្សាន្ត សរុបចំនួន ៨៥ កន្លែង ព្រមទាំងមានប្រជាពលរដ្ឋរស់សរុបចំនួន១,២៤៦គ្រួសារ ប្រជាជនសរុបចំនួន ៥,០៣៦នាក់ក្នុងនោះស្ត្រី ២,៤៤៦នាក់ ស្ថិតក្នុងឃុំខ្នងភ្នំស្រុកស្វាយលើ ខេត្តសៀមរាប មានប្រជាពលរដ្ឋ។
ជាមួយគ្នានោះនៅឧទ្យានជាតិព្រះជ័យវរ្ម័ន-នរោត្តម «ភ្នំគូលែន»ក្រសួងបរិស្ថានបានរៀបចំជាសហគមន៍តំបន់ការពារធម្មជាតិសរុបចំនួន៥រួមមាន៖ ១. សហគមន៍តំបន់ការពារធម្មជាតិព្រៃធំអន្លង់ធំ ២.សហគមន៍តំបន់ការពារធម្មជាតិព្រៃធំពពេល ៣.សហគមន៍តំបន់ការពារធម្មជាតិព្រៃភ្នំក្តួច ៤.សហគមន៍តំបន់ការពារធម្មជាតិព្រៃភ្នំម្នាស់ និង៥.សហគមន៍តំបន់ការពារធម្មជាតិជប់តាសុខ»។
លោក ឃិន ម៉េងឃាង បានឱ្យដឹងបន្ថែមទៀតថា៖«មកទល់បច្ចុប្បន្ននេះកម្ពុជាបានបង្កើតតំបន់ការពារធម្មជាតិបានចំនួន ៧៣ តំបន់ទាំងនេះមានផ្ទៃដីសរុបប្រមាណជា ៧,២ លានហិកតាស្មើនឹង ៤១%នៃផ្ទៃដីប្រទេសកម្ពុជាទាំងមូល។ ផ្ទៃដីដ៏ធំធេងនេះតម្រូវឱ្យមានការរៀបចំបែងចែកតំបន់ ការពង្រឹងការគ្រប់គ្រងនិងទាញយកសក្តានុពលពីធនធានធម្មជាតិទាំងនោះមកបម្រើឱ្យសេដ្ឋកិច្ចសង្គមប្រកបដោយស្មារតីទទួលខុសត្រូវ និងធានាឱ្យមាននិរន្តរភាព»។
តំបន់ការពារធម្មជាតិទាំងអស់នេះមានសក្ដានុពលយ៉ាងធំធេងសម្រាប់លើកកម្ពស់ និងជំរុញ វិស័យ ទេសចរណ៍ជាពិសេសអេកូទេសចរណ៍ ដែលក្នុងនោះមាន៖ ទេសភាពធម្មជាតិស្រស់ស្អាតខ្យល់អាកាសបរិសុទ្ធ ជីវៈចម្រុះ សត្វស្លាប ទឹកធ្លាក់ ឆ្នេរ ព្រៃឈើ សត្វព្រៃនិងកោះស្រស់ស្អាត តំបន់បេតិកភណ្ឌធម្មជាតិ និងវប្បធម៌ដែលជាគោលដៅទេសចរណ៍ដ៏សំខាន់ និងប្រកបដោយនិរន្តរភាព ដើម្បីទាក់ទាញភ្ញៀវទេសចរជាតិនិងអន្តរជាតិឱ្យទៅកម្សាន្ត។
គួរបញ្ជាក់ដែរថា ដើម្បីពង្រឹងនិងជួយសម្រួលដល់ការចូលរួមពីសំណាក់វិស័យឯកជនក្នុងការវិនិយោគអភិវឌ្ឍតំបន់អេកូទេសចរណ៍ក្រសួងបរិស្ថានបានប្រកាសដាក់ឱ្យអនុវត្តនូវគោលការណ៍ណែនាំក្នុងការអនុវត្តគម្រោងអភិវឌ្ឍន៍ទេសចរណ៍ផ្សារភ្ជាប់នឹងធម្មជាតិខ្នាតតូចស្ថិតនៅក្នុងតំបន់ការពារធម្មជាតិ និងរបៀងអភិរក្សជីវចម្រុះ។ សៀវភៅគោលការណ៍ណែនាំនេះក៏បានចែកជូនដល់អ្នកចូលរួមទាំងអស់ក្នុងកម្មវិធីនេះផងដែរ។
CSLEP ជាគម្រោងរបស់រាជរដ្ឋាភិបាលកម្ពុជាដែលដឹកនាំអនុវត្តដោយក្រសួងបរិស្ថាន និងក្រសួងអភិវឌ្ឍជនបទក្រោមហិរញ្ញប្បទានធនាគារពិភពលោក មូលនិធិបរិស្ថានសកលនិងរាជរដ្ឋាភិបាលកម្ពុជា។គម្រោងនេះមានគោលបំណងធ្វើឱ្យប្រសើរនូវការគ្រប់គ្រងតំបន់ការពារធម្មជាតិ ជំរុញឱកាសសម្រាប់ការអភិវឌ្ឍទេសចរណ៍ធម្មជាតិនិងបង្កើនសង្វាក់តម្លៃអនុផលព្រៃឈើ នៅតំបន់ទេសភាពជួរភ្នំក្រវាញនិងបឹងទន្លេសាប ដែលបាននឹងកំពុងអនុវត្តយ៉ាងសកម្មលើខេត្តគោលដៅចំនួន៧រួមមាន៖ កំពង់ស្ពឺ កោះកុង ពោធិ៍សាត់ បាត់ដំបង សៀមរាប កំពង់ធំ និងកំពង់ឆ្នាំង៕
.jpg)
.jpg)